O pleno da Corporación de Rianxo aprobou, cos votos a favor do Goberno de Julián Bustelo e máis do Partido Popular, o Regulamento do Servizo de Atención Temperá. A norma consta de 14 artigos nos cales, ademais de recollerse o obxecto e principais características do servizo, así como a súa metodoloxía, figuran tamén os medios materiais e persoais cos que deberá contar, as normas xerais de acceso e funcionamento, os dereitos e deberes das persoas usuarias, o protocolo de derivación e protocolo de incidencias, así como o baremo que determinará a constitución dunha listaxe de agarda en caso de que a demanda sexa superior ás persoas usuarias que o servizo pode atender nun mesmo momento.
O alcalde, Julián Bustelo, destacou que “coa posta en funcionamento deste servizo damos un importante paso en materia de política social achegando á veciñanza de Rianxo un recurso fundamental que ata o de agora tiña que buscar noutras localidades máis ou menos próximas”.
O texto someterase a exposición pública durante un prazo de trinta días hábiles a contar dende a súa publicación no Boletín Oficial da Provincia.
