Esta semana a gastronomía galega ten o seu centro de operacións en Noia, grazas á iniciativa Noia sabe aMAR, que se vai levar a cabo entre este venres 29 de novembro e o domingo 1 de decembro na Praza de Abastos da vila. O programa inclúe diferentes degustacións e demostracións gastronómicas (showcookings) para promocionar e potenciar os produtos da ría e da Lonxa local. Tamén haberá varias exposicións relacionadas coas artes de pesca, unha de fotografías de mariscadoras e outra de buques pesqueiros realizados por Domingo Manuel Montes Lestón. As actividades foron impulsadas pola marca Berberecho de Noia, a Confraría de Pescadores de Noia, Turismo de Cultura do Concello, Pescaderías e a Xunta. A axenda comezará este venres cunha proposta paralela ás degustacións e showcookings: un faladoiro organizado polo Concello no Casino as 18:00 horas, baixo o epígrafe Co MAR por diante. As actividades proseguirán ás 20.30 horas con degustacións de bocados de navalla e ameixa a cargo de Diego González.
