Os Concellos de Boiro, Rianxo e A Pobra informaron que o prazo para participarmos no Programa Integrado de Emprego 2024/2025 que desenvolven de forma conxunta os tres concellos entrou na súa recta final, coas últimas prazas dispoñíbeis a disposición das persoas demandantes de emprego da comarca do Barbanza e da contorna. O Programa, dirixido, a mellorar a capacitación de 100 persoas desempregadas, inclúe cursos de formación orientados aos sectores produtivos da bisbarra e as persoas asistentes recibirán unha axuda de 10 euros diarios por asistir ás accións formativas.
Nesta edición a oferta formativa inclúe os seguintes contidos: Técnicas de limpeza e departamento de pisos; Eventos, cátering e banquetes; Cociña básica; Elaboración de pezas cárnicas; Preparación de peixes e mariscos para a industria e venda; Identificación de alérxenos e manipulación de alimentos; Condución de carretillas; Xestión e control de compras e stock; Operacións básicas de caixa; entre outros.
Ademais, durante o desenvolvemento do programa vanse levar a cabo accións de información, orientación e asesoramento laboral; formación en habilidades sociolaborais e en técnicas de busca efectiva de emprego; sesións de adestramento profesional (coaching); formación en idiomas e novas tecnoloxías; formación específica para o emprego; prospección de ofertas laborais e prácticas profesionais.
O Programa basease nunha metodoloxía innovadora que inclúe aspectos como unha metodoloxía adaptada ás necesidades das usuarias; uso de novas tecnoloxías para favorecer a comunicación coas usuarias; uso de redes sociais para conseguir unha mellor comunicación; uso de ferramentas TIC (Tecnoloxías da Información e a Comunicación) para a busca de emprego; networking e acompañamento.
As persoas participantes percibirán unha axuda consistente en 10 euros por día de asistencia ás accións do Programa. Ademais, os concellos ofrecen medidas de conciliación para favorecer a participación no Programa segundo as necesidades de cada persoa usuaria.
O Programa Integrado de Emprego 2024/2025 dos Concellos de Boiro, Rianxo e A Pobra está financiado pola Consellería de Emprego, Comercio e Emigración da Xunta de Galicia e o Ministerio de Traballo e Economía Social.
O Programa do curso 2023/2024, que tamén se levou a cabo de forma conxunta, está a piques de rematar e conta xa cunha inserción laboral de 58 persoas que atoparon traballo grazas a participar nas accións formativas.
Máis información para participar no programa no enderezo electrónico emprego@boiro.gal ou os números de teléfono 659 247 963 e 650 042 409.
