Este sábado 23 de novembro recala en Muros o espectáculo Teatro dos Vieiros, Xoán Curiel e Charo Pita. Será ás 18.00 horas no auditorio do Centro Cultural e Xuvenil muradá. A entrada é de balde e pódese formalizar a reserva na web habilitada. Tamén é posíbel formalizar a reserva de xeito presencial no dito Centro Cultural, en horario de 8.00 a 15.00 horas.
Teatro dos Vieiros é unha función para maiores de 4 anos na que Xoán Curiel e Charo Pita interpretan a dous traballadores dun teatro que deben improvisar un espectáculo cando un furacán impide a chegada dos actores principais. Con música en directo, narración oral e teatro, esta comedia fresca e interactiva transportará ao público a un universo de imaxinación e aventuras, facendo ademais unha homenaxe á figura de Carvalho Calero.
A concelleira de Cultura, Caridad González, destacou que “estamos encantados de ofrecer unha proposta que combina música, teatro e valores educativos. Teatro dos Vieiros é un exemplo do noso compromiso con achegar programación de calidade e variada para todas as idades, especialmente as máis pequenas, que son o futuro da nosa cultura”.
