O Concello de Boiro conmemora o 25N coa lectura dun manifesto institucional e unha performance da asociación inclusiva da nosa comarca Ambar, ademais de novas actividades do ciclo de actividades Muller e Saúde que se desenvolve durante todo o ano.
O acto central será o luns 25 de novembro na Casa Consistorial de Boiro ás 12.00 horas cunha concentración para facer a lectura do manifesto institucional. O acto contará coa performance nomeada As paisaxes de Camille, unha acción artística sobre a loita contra a violencia de xénero realizada pola Asociación Ambar.
Ademais, durante o mes de novembro vanse levar a cabo dúas actividades dentro do programa Muller e Saúde, unha proposta que busca promover o benestar físico, mental e emocional da muller. A primeira das charlas será este venres 15 de novembro ás 17.00 horas no Centro Social de Boiro e consistirá nunha charla sobre Alimentación Antiinflamatoria impartida polo dietista da Consellería de Sanidade, Iván Parada Barral.
A segunda das sesións deste mes de novembro será o día 29 á mesma hora e vai consistir nunha charla sobre os beneficios do adestramento de forza para a prevención de enfermidades e estará impartida por Orlando Blanco Iglesias, técnico do Servizo de Estilos de Vida Saudábeis da Consellería de Sanidade.
