Un dos feridos foi evacuado ao centro hospitalario de referencia, mentres que outras catro persoas desprazáronse a un Punto de Atención Continuada polos seus propios medios.
No momento do incendio había dúas persoas no interior da vivenda, situada na rúa Viña de Millán: un home, que foi quen contactou co 112 Galicia en primeira instancia e que estaba no piso superior; e a muller falecida, situada na planta baixa, onde comezou lume.
Durante a súa chamada, que se produciu contra as 23:20 horas do martes, o alertador explicou que conseguira saír ao balcón. Nos momentos posteriores, un familiar alertou tamén ao 112 Galicia dos feitos e confirmou que había unha muller no baixo da vivenda.
De inmediato, os xestores do Centro Integrado de Atención ás Emerxencias solicitaron a colaboración de Urxencias Sanitarias de Galicia-061, dos Bombeiros do Salnés, do GES e de Protección Civil do Grove, do Servizo de Emerxencias de Sanxenxo e da Garda Civil. Ao mesmo tempo, informouse aos profesionais do Grupo de Intervención Psicolóxica en Catástrofes e Emerxencias (GIPCE), do Colexio Oficial de Psicoloxía de Galicia, por se resultara necesaria a súa intervención.
Ao fío da medianoite deuse por apagado o lume, que queimou un salón por completo e que se orixinou nun sofá, e confirmouse o falecemento dunha muller que foi localizada nesta mesma estancia.
Os servizos de emerxencias rescataron ao home cunha escada a través do balcón, e catro persoas máis que trataron de entrar na vivenda para axudar resultaron tamén afectadas por inhalación de fume.
