O Concello de Boiro está a executar as obras para a reforma do Mercado Municipal de Boiro. O alcalde, José Ramón Romero, e o concelleiro de Comercio, Formación e Emprego, Roberto Lojo, visitaron esta tarde a praza para coñecer como se están a desenvolver as obras.
As actuacións, dun importe de 145.657 euros teñen como finalidade unificar a imaxe do Mercado Municipal. “O que buscamos con esta actuación é mellorar a sinaléctica dos comercios e a iluminación do espazo para que sexa máis atractivo o producto”, afirmou o concelleiro. Estase a levar a cabo o cambio de luminarias, o pintado do falso teito segundo a tipoloxía do local, a colocación de mamparas e elementos decorativos; así
como a homoxeneización dos rótulos dos diferentes postos, un requisito xa disposto no regulamento do propio mercado municipal.
As obras estanse a acometer durante as tardes co obxectivo de non perxudicar a actividade normal dos praceiros. “Para este goberno o Mercado Municipal é estratéxico para fomentar o comercio local pois é un
polo de atracción para veciñanza de toda a comarca que fai as súas compras na nosa praza de abastos e nos nosos comercios. Imos seguir traballando para melloralo e dotalo de mellores servizos”, recoñeceu o
alcalde.
As actuacións estanse a levar a cabo mediante unha subvención do Ministerio de Industria, Turismo e Comercio, financiada con fondos Next Generation EU para a modernización do Centro Comercial Aberto de Boiro dun importe de 237.641 euros. Ademais da reforma do Mercado Municipal, leváronse a cabo outras accións para a promoción do comercio local como son atopan a implantación de sistemas de recollida e reciclaxe de envases, a instalación de puntos wifi e de recarga de vehículos eléctricos, posta en marcha de bonos para o comercio, formación en marketing dixital e posicionamento SEO para os negocios e outras actividades para a promoción do comercio.
