O lume xa fora apagado antes da chegada dos servizos de emerxencias.
O 112 Galicia tivo constancia a través do sistema de alarma instalado na casa, pouco despois das 14:30 horas. Logo de contactar cunha das particulares que se atopaba nese momento na vivenda, esta indicou que ardera unha tixola na cociña e tamén parte dunha campá extractora.
Pese a que xa non existía lume, os xestores do 112 Galicia solicitaron a intervención do GES de Noia, que se desprazou ata o lugar de Braño, no Freixo de Sabardes, para realizar as comprobacións necesarias na vivenda por precaución.
Logo da súa chegada, os membros do GES explicaron que, ademais da campá, o lume tamén chegara a afectar a varios mobles da cociña e a unha parede. Do mesmo xeito, indicaron que unha das persoas que se atopaban na casa vírase afectada polo fume.
Despois desa información, desde o 112 Galicia pasouse tamén o aviso ao Servizo de Urxencias Sanitarias de Galicia-061, que mobilizaron unha ambulancia ata o punto para atender á muller, a cal sería finalmente trasladada.
