O vindeiro sábado 17 de agosto celebrarase unha nova edición de A Feiriña do comercio local de Outes, en horario de 11.00 a 21.00 horas na rúa da Capela. Haberá postos dos establecementos do concello ligados a sectores enraizados no territorio como o agro ou a artesanía, e o programa complementarase con concertos, exposicións e animación infantil. Tamén haberá servizo de polbeira e hostalaría. A Feiriña vén da man do Concello de Outes e encádrase no seu obxectivo de dinamizar a economía local poñendo o foco no comercio de proximidade e coa intención de fomentar o produto local. “Nesta edición bateremos o récord de participación con máis de 60 postos á disposición do consumidor”, explicaron dende a organización.
