O Concello de Boiro confirmou a recepción dunha subvención por importe de 22.165 euros para o co-financiamento do servizo de vixilancia, rescate e salvamento en espazos acuáticos naturais. A subvención foi achegada pola Consellería de Presidencia, Xustiza e Deportes da Xunta de Galicia.
Dende o Consistorio explican que Boiro conta con servizo de socorrismo durante a época estival nas praias de Barraña, Barraña-Saltiño, Carragueiros e Mañóns. Un equipo composto por un total de 15 persoas que prestan servizo de luns a domingo en horario de 14.30 a 21.00 horas.
Boiro conta con máis de 27 quilómetros de litoral cun abundante número de praias cun nivel de ocupación alto, o que “fai imprescindíbel contar cun servizo de vixilancia e salvamento, socorrismo”, engade o Concello, explicando que os areais nos que se presta servizo son accesíbeis polo que se require tamén atención aos usuarios con mobilidade reducida mediante uso de cadeiras anfibias, muletas e outros.
Entre as tarefas do servizo de socorrismo están a avaliación de riscos asociados a cada unha das praias; comprobación diaria do equipo de salvamento; avaliación das condicións climáticas da praias e o estado do mar para uso das correspondentes bandeiras; realización de intervencións, fundamentalmente de primeiros auxilios; control das zonas incompatibles co baño; busca de persoas extraviadas; e intervencións de rescate.
