O Concello de Boiro colabora co Club de Baloncesto Santa Baia no desenvolvemento do Torneo Groinn Sta Baia 3×3 de baloncesto, que se desenvolve os días 3 e 4 de agosto (sábado e domingo) nas pistas deportivas de A Boqueira de A Negral. O concelleiro de Deportes, Marcos Fajardo, participou na presentación da proba xunto co coordinador do Club de Balonceto Santa Baia, Guillermo Outeiral.
Segundo informaron, trátase dun torneo puntuábel da FIBA, a Federación Internacional de Baloncesto, que se vai disputar o sábado e o domingo cuns 120 xogadores de 30 equipos masculinos, femininos e mixtos de diferentes categorías procedentes de toda España.
“Temos equipos de moito nivel que veñen de todo o territorio nacional e agardamos que supere o éxito da primeira edición en asistencia e público”, afirmou Guillermo Outeiral.
O 3×3 xógase a media pista, cunha única canastra e con posesións moi curtas, con 4 xogadores por equipo intercambiábeis.
“O Club de Baloncesto Santa Baia sempre traballa para seguir mellorando e estamos a ver que esta nova modalidade está a ter moito éxito ao ser moi dinámica e moi entretida tanto para ver como para xogar”, afirmou o concelleiro de Deportes, Marcos Fajardo, que ratificou o compromiso do Concello de Boiro co deporte no municipio e a colaboración da administración local “nas distintas probas deportivas que os nosos clubs deportivos organizan ao longo do ano”.
