Esta fin de semana (a primeira fin de semana de agosto) vaise celebrar a edición 2024 das Festas de Araño, organizadas pola comisión local de festas (da Asociación Cultural A Carballeira de Baia) co apoio do Concello de Rianxo e a Deputación da Coruña. Comezan o venres 2 de agosto, día adicado á Virxe do Carme, cunha sesión vermú de gaiteiros a cargo de Buxaina e pola noite cunha verbena na que actuarán Charlestón Big Band (a partir das 23.00 horas), e Discoteca Móbil Chocolate.
Na xornada do sábado 3 de agosto, día do Santísimo Sacramento, haberá ruadas a cargo da Banda de Gaitas Buxaina, un partido de fútbol no Pouso (Araño contra Buía, ás 19.30 horas), e unha verbena nocturna a cargo da Orquestra Gran Parada, e a Discoteca Móbil Plan B.
O domingo comezará cunha nova ruada de Buxaina, misas cantadas (polo Coro San Vicente de Cespón), unha sesión vermú coa Charanga Santa Compaña, inchábeis pola tarde para a rapazada (Arañolandia a partir das 18.30 horas) e música polo serán con Faíscas da Pontraga e Tanto Nos Ten.
