A Concellería de Cultura de Noia compartiu finalmente no Facebook o programa de actividades da nova edición da Feira Medieval, que comeza este xoves 18 e que vén cunha cumprida axenda de ruadas, desfiles, actuacións, exhibicións de loita, exposicións de falcoería (cetrería), actuacións musicais (en Santa María A Nova, no Tapal e noutros enclaves históricos). obradoiros de oficios tradicionais e actividades para a rapazada.
A Feira Medieval de Noia, que comeza este xoves 18 de xullo, estenderase até o domingo 21. A Área de Cultura de Noia que dirixe Pepe Pérez, organizadora novamente deste evento que chega xa á súa vixésimo quinta edición, compartiu tamén nas redes o cartel oficial desta nova edición creado por Suso Xogaina.
Novamente haberá artesáns habilidosos e artistas da rúa sobrados de talento, postos de artesanía, cultura medieval a pé de rúa e un amplo programa de actividades, como torneos, xogos para a rapazada e exhibicións, que, xunto co importante aporte de participantes que se agarda, de toda Galicia e do resto de España, contribuirán ao que vén sendo o obxectivo primordial da feira: crear en Noia unha atmosfera auténtica e máxica da Idade Media.
