O Concello de Lousame convocou os seus tradicionais cursos de natación, nas modalidades de iniciación e perfeccionamento, dirixidos a persoas a partir dos 4 anos. Os cursos terán un prezo de 10 euros por mes e terán lugar a partir do 28 de xullo na Piscina Municipal da Silva.
Achéganse 60 prazas, repartidas en tres grupos de idade: nenos e nenas de 4 a 6 anos, que terán clase de 12:30 a 13:00 horas e de 13:00 a 13:30 horas; rapaces e rapazas de 7 a 10 anos, con sesións de 11:30 a 12:30 horas; e maiores de 11 anos, que terán clase de natación de 10:30 a 11:30 horas.
As preinscricións ábrense este 28 de xuño e fican abertas ata o 8 de xullo para persoas empadroadas en Lousame, mentres que do 9 ao 19 de xullo abrirase unha quenda para que persoas non empadroadas no municipio poidan tamén anotarse. En ambos os dous casos, a reserva de praza farase a través de Bandoticket.com e as admisións faranse por rigorosa orde de inscrición. Máis información no Departamento de Deportes ou chamando ao teléfono 981 825 780.
Apertura da piscina
Por outra banda, a Piscina Municipal de Lousame abrirá as súas portas o luns 1 de xullo en horario de 15:00 a 21:00 horas, de luns a domingo. As entradas e os bonos de acceso poden adquirirse na Casa do Concello, en horario de 8:00 a 14:00 horas.
Coma en anos anteriores, os veciños e veciñas de Lousame poden optar por abonos de tempada ou por entradas puntuais. En ambos os dous casos, os menores de 6 anos teñen a entrada de balde. No caso dos abonos de tempada, os prezos son de 15 euros (rapazada entre 7 e 15 anos e maiores de 65) e 20 euros para o resto. No caso das entradas puntuais, o prezo será de 1 euro (de 7 a 15 anos e maiores de 65) e 2 euros para os demais.
Así mesmo, o Concello de Lousame establece unha tarifa reducida para persoas que se atopen en situación de vulnerabilidade social e que contemplan un abono de tempada por 2 euros (rapazada entre 7 e 15 anos e maiores de 65) e de 4 euros para o resto. Unha tarifa que se aplicará previo informe dos Servizos Sociais municipais.
