A Casa Real transmitiuo unha mensaxe de “proximidade e recoñecemento” aos familiares dos 21 mariñeiros falecidos no naufraxio do ‘Villa de Pitanxo’. Tal como vimos informando en “obarbanza.gal” esta semana, inaugurouse un memorial na súa honra no Porto de San Xoán, en Terranova.
“Cun emocionado recordo dos mariñeiros do Villa de Pitanxo falecidos en augas de Terranova, queremos mostrarvos a nosa proximidade e recoñecemento cando inaugurastes, coa axuda e colaboración de todos, o memorial no seu recordo no Porto de San Xoán”, sinalaron os reis Felipe VI e Letizia nun telegrama entregado aos familiares polo embaixador de España en Canadá, Alfredo Martínez Serrano.
Os familiares das vítimas viaxaron a Canadá para render homenaxe aos seus seres queridos a través de diversos actos, incluída a celebración dunha misa e a inauguración do memorial. Durante a xornada do domingo, a portavoz dos familiares, María José de Pazo, explicou que tamén se desprazaron ata Cabo Spear. Alí, nun emotivo xesto, lanzaron unha rosa branca ao mar por cada un dos falecidos e, ao unísono, pronunciaron os seus nomes.
