A Deputación da Coruña concedeu 649.532,97 euros en axudas ás confrarías de pescadores e agrupacións pesqueiras da provincia para “o fomento da súa actividade e a promoción dos seus produtos”. Este apoios incrementáronse un 30% con respecto ao ano anterior, pasando de 500.000 euros a case 650.000 euros, co obxectivo de “apoiar non só as actividades, o funcionamento e a contratación de servizos dos pósitos, senón tamén as festas de exaltación de produtos pesqueiros de proximidade, atendendo así unha das demandas do sector”, explicaron fontes da institución.
Este ano, as axudas que recibirá cada confraría oscilan entre os 5.100 e os 25.000 euros que poden destinar á contratación de persoal, adquisición de sementes de moluscos, alugueiro de maquinaria ou equipamentos necesarios para o desenvolvemento das actividades de confrarías, lonxas ou fábricas de xeo ou contratación de servizos externos, como a vixilancia.
Na liña de axustar o máximo posíbel o investimento ás demandas e necesidades das entidades, a deputada provincial e presidenta da comisión de Mar e Medio Rural, Cristina Capelán, mantivo varias reunións coas confrarías da provincia nos últimos meses. A deputada lembrou “a importancia social e económica que os sectores pesqueiro e marisqueiro teñen na provincia da Coruña, onde xeran miles de empregos”. E engadiu: “Desde a Deputación queremos seguir apoiando a un sector estratéxico na nosa provincia”, apuntou a Capelán, que destacou que “as axudas chegan á práctica totalidade dos pósitos da provincia e supoñen unha axuda fundamental para o seu funcionamento”.
Entre as entidades beneficiarias da nosa comarca atópanse as seguintes (cos importes da subvención):
-Confraría de Pescadores de Carreira e Aguiño:13.800,00€.
-Confraría de Pescadores de Muros: 20.000,00€.
-Confraría de Pescadores da Pobra do Caramiñal: 20.000,00€.
-Confraría de Pescadores de Cabo de Cruz: 19.000,00€.
-Confraría de Pescadores San Andrés (Portosín): 19.000,00€.
-Confraría de Pescadores San Bartolomé de Noia: 20.000,00€.
-Confraría de Pescadores San Pedro Santa Uxía de Ribeira: 20.000,00€.
-Confraría de Pescadores San Telmo de Porto do Son: 20.000,00€.
-Confraría de Pescadores de Rianxo: 19.000,00€.
