A Xunta sacou a licitación este 11 de xuño a segunda fase dos traballos do Plan de saneamento de Galicia. O contrato, cun orzamento de 1,3 millóns de euros, ten como obxectivo “facilitar avances no estado da rede coa que conta a comunidade e optimizar o aproveitamento dos recursos hídricos galegos”. Estes datos foron achegados este martes pola conselleira de Medio Ambiente e Cambio Climático, Ángeles Vázquez, que visitou as obras de saneamento que Augas de Galicia está a realizar no concello de Rois, onde salientou “que este plan xa está moi avanzado”. En concreto, dixo, “xa se completou a primeira fase dos traballos, na que se analizaron os sistemas de depuración existentes no territorio e se fixo unha diagnose das necesidades”.
Nun plano máis concreto, Vázquez avanzou que esta segunda fase do plan de saneamento incluirá a creación do rexistro oficial de aglomeracións urbanas de Galicia -en aplicación da lei galega do ciclo da auga- e adaptará tamén a estratexia a seguir ao disposto na nova directiva de augas residuais europeas, que se aprobará previsiblemente este ano.
Ángeles Vázquez explicou que esa estratexia “propiciará a reutilización de augas residuais xa depuradas cando sexa viábel en función dos usos previstos, das condicións sanitarias exixíbeis e de acordo cos estudos técnicos e económicos que se fagan”.
O plan proporá medidas coas que mellorar as instalacións de depuración que resulten ineficientes, reducir as infiltracións nas redes municipais, optimizar a xestión das augas pluviais así como a eficiencia enerxética dos sistemas de saneamento.
Obra de Rois
En canto ás obras de saneamento na parroquia de Urdilde, en Rois, a conselleira explicou que as actuacións implican un investimento de máis de 850.000 euros e que o obxectivo é que estean rematadas a finais de ano. A finalidade é contar cunha nova depuradora e construír a rede de colectores correspondente (máis de 580 metros de tubaxes) que darán servizo a unha poboación equivalente de preto de 550 habitantes.
Os traballos permitirán mellorar o sistema de depuración existente na zona, conectando as vivendas á nova estación depuradora de augas residuais (EDAR), o que terá beneficios no medio ambiente e na calidade das augas da contorna.
Esta é unha das actuacións incluídas nos orzamentos do Executivo galego para este ano, que mobilizará un total de 85 millóns de euros en distintas actuacións de saneamento e depuración de augas -incluíndo a explotación de 27 depuradoras cuxa xestión foi cedida á Xunta polos concellos- e 23 millóns de euros na mellora dos sistemas de abastecemento municipais.
