O Concello de Porto do Son activou a través dos departamentos municipais de Deportes e Benestar Social un programa de envellecemento activo na auga para as persoas maiores do termo municipal, en traballo conxunto co Complexo Deportivo da Piscina Municipal. Trátase dunha iniciativa gratuíta de actividades de mantemento acuático que se desenvolve en tres quendas: o 28 de maio, o 4 de xuño e o 11 de xuño. A primeira das quendas levouse a cabo esta mesma semana con gran éxito de participación e contando coa participación dun “grupo moi dinámico, traballador e divertido”, en palabras das entidades organizadoras.
Segundo engaden respecto das vantaxes que achega este tipo de exercicio físico, “o medio acuático permitiranos desenvolver programas acordes coas nosas necesidades, sumando en saúde e previndo enfermidades; co fin de manter a nosa autonomía e independencia a través da motivación persoal e do favorecemento das relacións sociais”.
Máis información e inscricións na recepción da Piscina Municipal ou chamando ao 604 051 189.
