A plataforma Stop Deshaucios Barbanza informou de novos casos de fogares da nosa comarca en risco de sufrir un desafiuzamento e ficar na rúa sen alternativa habilitacional. Trátase de dúas familias de Ribeira e Boiro que están pendentes de ordes xudiciais de desaloxo.
Respecto da familia de Ribeira, un núcleo con dous menores ao seu cargo, a plataforma explica que dende o Instituto Galego de Vivenda e Sol (Xunta) e da Oficina da Valedora do Pobo están a traballar para evitar o seu desaloxo, aínda que a situación de extrema urxencia xa que o desafiuzamento está fixado para este 30 de maio. Ademais, estanse a realizar xestións coa propiedade do Grupo Santander (Divarian) para poder suspender a toma de posesión e poder garantir un tempo prudencial para que a familia poida atopar outra vivenda en alugueiro. Porén, a plataforma sinala que as dificultades para atopar unha vivenda temporal “son evidentes ante a falta de domicilios postos en alugueiro na capital do Barbanza… un problema do que haberá que analizar as causas e as súas consecuencias”, explica Stop Deshaucios.
Respecto da familia de Boiro, tamén está a ver defendido o seu caso dende a oficina da Valedora do Pobo, que xestiona unha alternativa habitacional para un núcleo familiar que tamén se atopa en situación de vulnerabilidade. Trátase dunha familia monoparental, cunha nai e un fillo menor de idade, con escaso ingresos. “A falta de vivendas, ao dispor da Xunta de Galicia para facilitar o realoxamento de familias vulnerábeis agudiza o problema da habitabilidade para decenas de familias da comarca do Barbanza”, engade a plataforma.
