O vicepresidente, Xosé Regueira, e a deputada de igualdade, lingua e dereitos civís, a outense Soledad Agra, viaxaron ata Suiza para visitar na cidade de Délemont a exposición Taxi – Compostela, no Museo du Xura.
Alí reuníronse coa directora do museo Nathalie Fleury; o comisario e autor da exposición, o xornalista Antonio Rodríguez; o fotógrafo Pierre Montalvon; o ministro conselleiro da Embaixada de España en Berna, Francisco de Miguel, e o conselleiro de asuntos científicos e culturais da Embaixada Suíza para España e Andorra, Alberto Giovanetti.
Na xuntanza abordaron posíbeis vías de colaboración que lle permitan á Deputación levar a exposición á provincia da Coruña, resaltando o legado feminino na emigración, a conservación da lingua e a preservación histórica.
“As mulleres tiveron un papel protagonista e fundamental, foron quen de construír unha nación, unha matria, e de facer país fora del”, apuntou Soledad Agra, “deixando atrás os seus fogares e, en moitos casos ata ás súas crianzas, para darlle un presente e un futuro mellor, con moito traballo e sacrificio”.
Esta reunión constitúe unha colaboración transnacional e un compromiso da Deputación coa preservación da memoria histórica, tendendo unha ponte “entre dúas realidades xeográficas e culturais distantes pero unidas pola historia e as experiencias compartidas da emigración” engadiu Agra.
A mostra, que inclúe textos do xornalista Antonio Rodríguez, fotos de Pierre Montavon e vídeos de Aubin Hellot, fai un percorrido pola historia da inmigración galega dende a posguerra ata a crise do 2008 e a actualidade.
Taxi–Compostela pode visitarse en Délemont, unha rexión situada na fronteira entre Suíza e Francia e berce da inmigración galega en Suíza. Tamén alberga varios obxectos simbólicos cedidos por migrantes.
“A emigración da nosa provincia a Suíza e, máis concretamente, a esta zona, forma parte da nosa esencia e da nosa historia recente” apuntou Regueira, engadindo que “dende as administracións públicas debemos sacar peito de fitos como este que forman a nosa memoria colectiva”. Neste sentido, sinalou, “esta exposición que amosa tan ben unha realidade de moitos galegos e galegas, é unha homenaxe a todas esas persoas que tiveron que deixar Galiza para formar un segundo país a partir da nosa identidade aquí, nesta terra tan marabillosa”.
Inaugurada en setembro de 2023 en Suíza, “agora é o momento de que viaxe ata Compostela e de que percorra todos eses lugares de orixe dos migrantes”, apuntou o vicepresidente. Dende a Deputación buscarase, así “o xeito de achegar a exposición aos seus protagonistas”.
