CONGALSA, empresa especializada en alimentación con sede na Pobra do Caramiñal, participará novamente en Seafood Global Expo, unha das feiras de produtos do mar máis importantes do mundo cuxa trixésima edición arrincará o próximo 23 de abril na cidade de Barcelona.
Segundo apuntan desde a organización, a edición 2024 deste foro está chamada a converterse “na maior da súa historia cunha superficie de 50.000 metros cadrados e a participación de expositor de 84 países”.
Para Julio Simarro, conselleiro delegado da Corporación CONGALSA, “trátase dun dos eventos mundiais de referencia para o comercio de produtos da pesca e para toda a súa cadea de subministración. Por este motivo, aproveitaremos a nosa presenza no foro para fortalecer as nosas relacións cos nosos clientes e provedores, especialmente cos de carácter internacional, á vez que presentaremos as principais novidades do noso catálogo de produtos no marco do noso espazo expositor na feira”.
Caseta 5F501
No recinto de Fira Barcelona, a caseta de CONGALSA será a 5F501. Así, entre o 23 e o 25 de abril, os visitantes que se acheguen ata o espazo expositor da empresa do Barbanza poderán coñecer de primeira man algunhas das solucións máis novas que esta lanzou recentemente ao mercado. En concreto, un dos obxectivos da compañía é “poñer en valor os produtos de pesca litoral”, que cada vez teñen un maior protagonismo dentro do seu catálogo de solucións para a canle HORECA (Hostalería, Restauración e Cafeterías) e que son comercializados baixo a marca Ibercook Food Service.
Amais do devandito CONGALSA divulgará o seu proxecto de valorización dos produtos de pesca local que, segundo avanza Julio Simarro, “consolídase con novas referencias”. Entre estas referencias, destaca o lirio rebozada ao ovo (un produto que combina o sabor e popularidade deste peixe de lonxa, cun delicioso rebozado convertido xa nun sinal de identidade das propostas da empresa).
Algunhas receitas
Esta nova referencia, ademais, compleméntase coa gama de filetes bolboreta de lirio e xarda ao natural, que dentro do espazo expositor de CONGALSA na Fira Barcelona poderanse degustar a través de deliciosas receitas preparadas polos chefs da compañía, en elaboracións tan singulares como popietas de lirio e xamón serrano ou tostas de xarda afumada.
Finalmente, outra das novidades que CONGALSA presentará en Seafood Expo Global, o arito empanado, foi concibida “pensando na demanda de mercados exteriores”, sinala Julio Simarro. “Trátase dunha referencia que completa o extenso catálogo de produtos da nosa empresa, concibida preferentemente para ser servida a modo de aperitivo ou tapeo na canle hostaleira”, conclúe o directivo da Corporación Empresarial CONGALSA.
