Na mañá de onte, domingo 7 de abril, arredor de oitenta persoas de Lousame participaban nunha andaina que conforma o Camiño a Santiago pola ría de Muros-Noia, organizada polo Club de Xubilados de Lousame en colaboración co Concello de Lousame. Os e as camiñantes percorreron 16 quilómetros entre Porto do Son e Portobravo (Lousame).
Indo á expedición, dicir que daba comezo ás 9 horas da praza Teodomiro Hidalgo de Lousame para desprazárense até o faro de Cabeiro (Porto do Son), para continuar o Camiño sempre a carón da costa pola pasarela de madeira da praia de Aguieira, a beirarrúa entre O Alto da Silva deica a praia de Coira, para seguir polo paseo de Coira até o Club Náutico de Portosín. Logo de bordear o esteiro do Tambre, atravesaron Noia polo Tapal, o Cantón e a Corredoira até a Ponte de Traba, dende onde volveron a Lousame.
Dicir que a andaina estivo encabezada polo presidente do Club de Xubilados de Lousame, Francisco Avelino García Nieto; quen estivo acompañado polas concelleiras de Deportes, Mairel Agrafojo Nieto, e de Cultura, Silvia Agrafojo; e polo concelleiro de Seguridade Viaria, José Antonio Ces Barreiro.
Engadir que despois do éxito de participación nesta primeira etapa, dende o Club de Xubilados xa adiantan que nos vindeiros días convocarán a segunda parte, prevista para o domingo 5 de maio, nesta ocasión con saída en Muros. A intención é percorrer o traxecto entre Muros e Noia en tres etapas: 5 e 12 de maio e 9 de xuño.
