O Goberno local de Rianxo e o grupo municipal do PSdeG-PSOE asinaron esta semana un acordo para a aprobación das dedicacións do Executivo rianxeiro. O acordo, segundo sinalaron os representantes dos grupos, achanda o camiño para a aprobación do orzamento municipal para o exercicio 2024, unhas “contas fundamentais para sanear a economía municipal nas que se seguirá traballando nos próximos días”. O acordo foi asinado polo alcalde Julián Bustelo e o voceiro do grupo municipal do PSdeG-PSOE, Óscar Rial.
No transcurso da sinatura o rexedor comentou que “a política é precisamente isto que estamos facendo hoxe, é chegar a acordos, a consensos, e pensar fundamentalmente nos veciños e veciñas, que son aos que nos debemos. Este acordo que asinamos é un acordo que non beneficia nin a Rianxo en Común, nin ao Goberno, nin ao PSdeG-PSOE. É, porén, un acordo que vai beneficiar a toda a cidadanía do noso concello, que aporta estabilidade e un punto de encontro entre as formacións asinantes a partir do que estou seguro que xurdirán futuros acordos para a mellora das infraestruturas e dos servizos municipais”.
Bustelo destacou tamén o traballo levado a cabo polas dúas formacións e agradeceu a disposición e iniciativa do PSdeG-PSOE para buscar o consenso.
Pola súa parte, o voceiro do grupo municipal do PSdeG-PSOE, Óscar Rial expresou “a súa gratitude cara a todas as partes involucradas no proceso de negociación, destacando a vontade da agrupación socialista de cara a chegar a este acordo, e destacou o compromiso compartido de traballar en beneficio de todos os cidadáns de Rianxo”. Ademais, subliñou a importancia da colaboración e o diálogo continuo para lograr resultados significativos e sustentábeis a longo prazo. Engadiu tamén que “agardamos traballar en estreita colaboración para poder levar a cabo os puntos que se acordan neste escrito que asignamos hoxe e como punto de partida para futuras implementacións de iniciativas e proxectos que impulsen o desenvolvemento económico, social e cultural do noso Concello”.
O acordo recolle dez liñas estratéxicas de traballo a abordar de maneira conxunta durante os vindeiros meses:
-Abordar a modificación do acordo asinado co Concello de Boiro en materia de servizos sociais.
-Constitución dunha mesa de traballo coa finalidade de que ambas formacións desenvolvan unha proposta de Plan Concilia Municipal.
-Revisión das subvencións nominativas que perciben as entidades deportivas municipais, apostando por un modelo de concorrencia competitiva. Revisarase á alza e de maneira equitativa os importes que as diversas entidades perciben.
-Revisar as bases das axudas escolares municipais.
-Abordar o proceso de licitación do servizo de abastecemento de auga e saneamento.
-Abordar o proceso de licitación do servizo de recollida do lixo e limpeza viaria.
-Abordar a creación da Coordinadora de ANPAs.
-Convocatoria do Consello Escolar Municipal antes da finalización do curso 2023-2024.
-Convocatorio da Mesa de Comercio Local durante o mes en curso.
-Seguimento do proxecto de construción dunha residencia pública no municipio.
