A asociación da nosa comarca Amicos puxo en marcha dúas novas formacións gratuítas para persoas desempregadas con discapacidade ou en risco de exclusión social. Así, en abril comezarán na sede da entidade, en Comoxo, o curso Instalación e mantemento de xardíns e zonas verdes e a formación Actividades auxiliares de servizos administrativos e xerais. Este último impartirase tanto en modalidade presencial como en teleformación. O prazo de inscrición remata o venres 22 de marzo para o de xardinería e o 5 de abril nos de administración.
Así, Instalación e mantemento de xardíns e zonas verdes comezará o xoves 4 de abril, e levarase a cabo no centro ata o 13 de setembro, en horario de 9.30 a 14.30 horas. Unha vez finalizado o curso con éxito, os participantes estarán cualificados para desenvolver labores en invernadoiros, viveiros e xardíns, e contarán con coñecementos para a conservación de parques urbanos e botánicos, entre outros.
Para inscribirse neste curso, de 488 horas de duración, as persoas interesadas deberán contar cun título de graduado en educación secundaria obrigatoria ou co certificado de profesionalidade en Actividades auxiliares en viveiros, xardíns e centros de xardinería. O prazo de inscrición estará aberto ata o venres, 22 de marzo.
Por outra banda, o curso de Actividades auxiliares de servizos administrativos e xerais ofrecerá ao alumnado as ferramentas e coñecementos necesarios para realizar tarefas e trámites de administración a nivel profesional.
A formación ten unha duración de 448 horas, que inclúe as prácticas en empresas. Dará comezo o 16 de abril, e desenvolverase ata o 13 de setembro en horario de 9.30 a 14.30 horas. Neste caso, o prazo de inscrición mantense aberto ata o venres, 5 de abril, tanto para a modalidade presencial como para a opción de teleformación.
Estas accións formativas están organizadas por Amicos coa colaboración da Consellería de Promoción do Emprego e Igualdade da Xunta de Galicia e o Ministerio de Educación e Formación Profesional. As persoas interesadas poden inscribirse a través do 981 865 716, así como no correo electrónico formacion@amicos.org. Estos cursos contan cun total de 15 prazas por formación, e son compatíbeis coa solicitude de axudas para a formación da Xunta de Galicia.
