Elas, o grupo de Artes Escénicas da Asociación Ambar das Persoas con Diversidade Funcional, representou no Concello de Boiro A Serea Mariña pola conmemoración do Día Internacional da Muller. Crearon esta peza escénica canda o artista Fran Sieira e foi inaugurada en Mar Diverso, o festival de arte inclusiva e patrimonio costeiro da Asociación Ambar que se celebrou hai dous anos.
Noelia Argibay, Ángeles Devesa, Raquel Hernández, Marina Mondelo, Paula Ramallo, Montse Queiruga e Mercedes Ríos, son as artistas que interpretaron esta peza escénica que fala da muller costeira, da riqueza na diversidade, do traballo no mar… . Elas logran transportarnos a través da arte, do movemento e a música ao que a elas lle inspira o lugar no que vivimos.
A actuación realizouse no marco do acto institucional que tivo lugar esta mañá no Concello de Boiro, no que tamén se fixo a lectura do manifesto colectivo.
Mulleres En Comunidade
Cumprindo ca tradición, Ambar e Congalsa volveron a conmemorar o 8M xuntas. Un grupo de mulleres representantes de Ambar visitou as instalacións de Congalsa e levaron un obsequio para todas as traballadoras da corporación. Araceli Pouso, Berta Torrado, Esperanza Silva, Manola Davila, Manola Vidal, María Helena, Mari C. Crujeiras e Vanesa Villar foron as encargadas de entregar o obsequio á toda a plantilla na sede de Congalsa para conmemorar este día. Tamén estiveron presentes no acto Helena Teira, coordinadora xeral de Ambar e Jontxu Argibay, facilitador na área artesanal da Asociación.
