Dende este mércores 28 de febreiro, na plataforma Ataquilla.com xa podemos adquirir as entradas para a obra teatral Síbaris que se representará no Coliseo Noela de Noia o 16 de marzo ás 20:30 horas. Síbaris é unha obra baseada no único texto teatral (un texto póstumo) do escritor vigués Domingo Villar, dirixida por Lois Blanco e con Carlos Blanco e Belén Constenla no reparto.
O texto teatral deixouno rematado e entregado Domingo Villar antes de morrer. A adaptación vén da man da compañía Condetrespés, cun elenco no que tamén están Oswaldo Digón e Pablo Novoa. A escenografía corre a cargo de Marta Villar, curmá do escritor. En Síbaris o escritor presenta en clave de comedia negra clásica unha reflexión aguda, cómica, ás veces desapiadada, arredor da literatura e todo o que a rodea. O seu protagonista é Víctor Morel, un escritor en crise creativa , vinte anos despois de que conseguise acadar o éxito coa súa novela Síbaris. Agora está bloqueado e nunha situación económica cada día peor.
