O Concello de Ribeira puxo en marcha a recollida separada da materia orgánica, co obxectivo de permitir aos fogares, coa distribución de contedores marróns, unha meirande sustentabilidade á hora de xerar e depositar refugallos. Para facilitar esta recollida selectiva dos residuos, o Concello repartirá caldeiros entre a poboación e tarxetas de apertura do contedor marrón. Estas son as datas e os lugares de distribución:
24 febreiro no Malecón de Ribeira
9 marzo no Mercado Municipal de Palmeira
16 marzo no Conservatorio Municipal de Aguiño
Tódolos luns de 9:00 a 11:00 no Departamento de Medioambiente na Casa do Concello
Ademais, nas vindeiras semanas tamén se repartirán caldeiros para compostaxe en tódalas parroquias co propósito de fomentar a compostaxe doméstica e a redución de refugallos orgánicos; facilitando así a produción de compost de calidade e o desenvolvemento rural máis sustentábel.
Por outra banda, o Concello fixo os días pasados un primeiro balance breve da actividade xerada ao abeiro da recollida separada da materia orgánica, posta en marcha este mes. Segundo fixeron saber fontes do Consistorio, nos primeiros días de febreiro xa se entregaron máis de 400 tarxetas e cubos de orgánica para domicilios á veciñanza de Ribeira, Palmeira e Aguiño. Trátase, explican, de achegar material co que separar do xeito máis cómodo posíbel o residuo orgánico da fracción “resto”, co fin de “evitar desperdicio de alimentos”.
Ademais, a distribución dos colectores marróns onde depositar o compost pódese consultar na Rede.
“No contedor de residuos orgánicos, pódense depositar materiais biodegradábeis, é dicir, aqueles que se descompoñen naturalmente a través de procesos biolóxicos.” explicou a concelleira Antía Alberte.
