A Concellería de Cultura de Noia volve pór en marcha a iniciativa Cantos de Taberna, e faino coa colaboración da Asociación Pon un Sancosmeiro. Coma en anos anteriores a finalidade deste proxecto será fomentar e reivindicar a tradición musical popular galega, estreitamente vencellada á hostalería das nosas aldeas, vilas e cidades. Porase o foco en organizar obradoiros e sesións cos que sumar novos adeptos e intérpretes á tradición da música popular noiesa de taberna. Para iso anunciarase en datas vindeiras un programa de actividades participativas nos establecementos, que reivindicarán deste xeito as cancións que acompañaron a historia de Noia nas décadas pasadas.
O obradoiro de formación celebrarase de 20:30 a 21:45 os días 1 e 8 de marzo e o 5 e 19 de abril no local de ensaio. Para anotarse cómpre enviar un correo electrónico a culturaconcellodenoia@gmail.com indicando o nome nome e o teléfono da persoa interesada en participar.
“Cremos que esta iniciativa é unha forma divertida e enriquecedora de preservar e difundir a nosa cultura, e animamos a todos aqueles interesados en participar a que se sumen a este proxecto”, sinalan dende a Área de Cultura de Noia e a Asociación Pon Un Sancosmeiro.
As inscricións están abertas até o 20 de febreiro e as prazas son limitadas.
