Avanza a semana e proseguen os traballos impulsados polo Concello de Noia (a través da Brigada Municipal de Obras) para dotar de saneamento varias vivendas unifamiliares da Barquiña que ata agora non dispoñían deste servizo.
Esta actuación forma parte dun programa máis amplo e integral do Concello para estender a rede municipal ao maior número posíbel de vivendas e, ao mesmo tempo, corrixir deficiencias existentes.
Un dos obxectivos destes traballos é avanzar na correcta separación das augas pluviais e fecais, de feito segundo recoñeceron recentemente as Brigadas, na zona detectáronse conexións de augas residuais á rede de pluviais que agora se irán corrixindo para garantir que as augas pluviais discorran pola rede que lles corresponde, e as augas fecais sexan conducidas á rede de saneamento e, finalmente, á depuradora.
“Son actuacións que moitas veces quedan baixo terra e non se ven, pero que son fundamentais para mellorar os servizos básicos, evitar vertidos e avanzar cara a unha rede de saneamento máis eficiente e axeitada”, informou o Concello.
