O proxecto de construción do centro de día de Rianxo nas dependencias do Pazo de Rianxiño recibiu este xoves 10 de setembro un novo impulso. Fíxoo nunha sesión extraordinaria do pleno da Corporación, na que se acordou unha última modificación necesaria no proxecto para, a continuación, asinar o convenio de colaboración coa Deputación da Coruña e licitar as obras.
Como lembraremos, a Corporación de Rianxo aprobou inicialmente en outubro do 2025 (cos votos a favor do grupo do Goberno, do Partido Popular e do BNG) o proxecto técnico para a construción do centro de día nas dependencias do Pazo de Rianxiño, así como a solicitude de cofinanciamento á Deputación de Coruña para facerlle fronte as obras.
As actuacións a levar a cabo consisten fundamentalmente en dotar o espazo anexo ao edificio histórico dunha nova distribución, con espazos mellor iluminados e accesíbeis. Contará con 360 metros cadrados de superficie útil e con todas as prestacións necesarias para a posta en funcionamento do servizo.
O proxecto foi redactado co asesoramento de persoal experto neste tipo de equipamentos e xa obtivo a autorización da Dirección Xeral do Patrimonio Cultural.
Trátase “dun recurso sociosanitario fundamental, xunto coa residencia de maiores, para o que vimos traballando dende o primeiro segundo da lexislatura e que está cada vez máis preto”, sinalou o alcalde Julián Bustelo.
