O BNG de Rianxo reclama novamente ao Concello e ao alcalde o arranxo do paseo de madeira que leva á praia da Torre. Segundo a agrupación, trátase “dunha actuación que a formación nacionalista leva tempo demandando e que continúa sen realizarse agora que xa rematou o verán”. Tamén sinalan que reiteraron as advertencias sobre a necesidade de acometer a reparación desta pasarela antes da chegada dos meses estivais, “precisamente pola maior afluencia de persoas á zona e polo incremento do uso do paseo, situado xunto á praia da Torre”.
Porén, indican, “pasaron todos os meses de verán e o paseo continúa sen ser reparado”, mantendo unha situación que, segundo denuncia o portavoz Fran Rei, “pode supoñer un risco para as persoas que o utilizan”.
E engaden: “O Concello sabía desde hai tempo do estado desta pasarela e tamén sabía que durante o verán sería cando maior uso tería. Por iso reclamamos que se actuase con previsión e se priorizase o seu arranxo antes da temporada estival. Especialmente cando o deterioro da madeira pode provocar caídas ou outros percances entre as persoas usuarias”, en palabras do edil nacionalista, José Vázquez.
Por estes motivos, o BNG de Rianxo volve reclamar ao alcalde e ao Concello que “procedan canto antes ao arranxo integral da pasarela, garantindo que esta poida ser utilizada nas condicións adecuadas de seguridade”.
“Rematou o verán, pero o problema segue aí. Levamos meses reclamando o arranxo e volvemos esixir ao Concello que actúe e repare dunha vez o paseo da Torre”, conclúen.
