A Piscina e o Ximnasio Municipal de Muros abren de novo as súas portas este luns, 28 de setembro, tras as tarefas de mantemento das instalacións.
Os tres últimos días de setembro (28, 29 e 30) serán xornadas de portas abertas para toda a veciñanza. Polo tanto, non haberá clases dirixidas nin de auga nin de seco.
Nestes tres días, poderanse usar libremente o ximnasio, a sala de actividades, as piscinas e a sauna con todas as melloras realizadas.
O xoves 1 de outubro comeza con normalidade o horario de inverno.
As melloras que se realizaron na instalación son as seguintes: baleirado e encintado dos dous vasos, limpeza das praias da piscina, melloras no alumeado do recinto, reposición de material, arranxo das pechaduras das billeteiras, reposición da tarima e o rodapé no ximnasio e a sala de actividades, posta a punto das máquinas do ximnasio, baleirado e limpeza dos acumuladores da piscina (ACS e Solar), limpeza dos vasos de compensación da piscina, posta a punto das caldeiras e das bombas das piscinas, pintado de vestiarios e sala de actividades, posta a punto do sistema de placas solares (cun importante investimento para poder dotar a instalación deste sistema, que suporá un destacado aforro económico, segundo destacou o Concello). Por certo que o ximnasio conta agora cun saco de boxeo, a petición de moitos usuarios (o seu uso terá uns horarios e unhas normas específicas de seguridade e de mantemento).
O concelleiro de Deportes, Damián Torea, quere agradecer “o traballo realizado pola Brigada Municipal de Obras, os electricistas, o persoal de mantemento da piscina, monitores, persoal de limpeza do concello e algunha empresa externa que nos botou unha man con determinados traballos para que todo estivese a punto”.
