O Grupo Municipal Socialista de Rianxo emitiu un comunicado no que denuncia a situación que continúa padecendo a veciñanza da Marquesa, onde, segundo sinala o grupo, “varias pistas permanecen levantadas desde hai preto de nove meses, sen que se teña dado unha solución definitiva”.
O pasado mércores 15 de xullo, representantes do PSdeG desprazáronse ata a Marquesa despois das chamadas recibidas por parte da veciñanza para comprobar de primeira man a situación. “Nove meses despois, a realidade seguía practicamente igual, baixo o argumento de que o terreo necesitaba asentar”, sinalan dende a a agrupación, engadindo que “esta explicación non pode converterse nunha xustificación permanente para non actuar, especialmente cando esa situación non se dá en toda a aldea e cando os veciños levan meses soportando as consecuencias das obras”.
Critican que “o venres 17 de xullo anunciábase nas redes sociais que durante a semana seguinte se actuaría na zona, pero dúas semanas despois, a realidade segue sendo a mesma”. Para os socialistas, “o problema non é só que as actuacións non cheguen, senón tamén que os anuncios realizados nas redes sociais poden crear unha sensación de normalidade e de xestión que non se corresponde co que está a vivir a veciñanza na rúa”. E engaden: “Parece que todo o que se publica nas redes sociais debe ser certo porque se presenta como unha realidade, pero logo hai que saír á rúa para comprobar que a realidade de Rianxo é outra”.
“Non cuestionamos que unha obra poida ter dificultades técnicas. O que non podemos aceptar é que esas dificultades se prolonguen durante meses e que, mentres tanto, se anuncien actuacións que non se materializan”, indican.
O Grupo Municipal Socialista reclama que “se actúe coa máxima urxencia, que se informe á veciñanza da situación real dos traballos e que se deixe de substituír a solución dos problemas por anuncios nas redes sociais”.
