O Concello do Porto do Son compartiu nas redes as imaxes dun novo caso de vandalismo e incivismo nas instalacións públicas que pertencen á toda a cidadanía.
Desta volta os vándalos cebáronse no equipamento da Casa da Cultura de Xuño, que foi obxecto de diversos desperfectos en varias das súas dependencias, incluído o salón de actos (con mesas e mobiliario esnaquizado) e máis os servizos (onde se deixaron os lavabos totalmente inservíbeis).
“Trátase dunha auténtica falta de respecto aos bens públicos que son de toda a veciñanza”, sinalaron fontes do Concello.
Dende o Consistorio tamén se fixo “un chamamento ao sentidiño e ao civismo”, ao tempo que lembran “que os bens e espazos públicos están concibidos para o uso e goce de todas e todos; así mesmo é o noso deber coidalos, protexelos e respectalos”.
O Concello fai un convite á veciñanza que poida ter datos sobre estes feitos para que comparta información sobre a identidade das persoas responsábeis dos actos vandálicos perpetrados en Xuño (“ou de calquera outro acto que atente contra os bens da nosa veciñanza”) e sexa comunicada canto antes aos corpos de seguridade.
