Ampliada a alerta vermella por calor a 158 concellos. A chegada dunha masa de aire cálido procedente do norte de África deixará os termómetros por riba dos valores habituais para esta época. As brisas da tarde aliviarán a costa, mentres que Compostela vivirá unha xornada asfixiante.
Preparen o protector solar e busquen a sombra. A predición meteorolóxica para este sábado, 4 de xullo, confirma que Galicia quedará plenamente baixo a influencia das altas presións situadas ao norte da península Ibérica. Este bloqueo anticiclónico actuará como unha canle aberta para a entrada directa de masas de aire moi cálido procedentes do norte de África, o que provocará un ascenso xeral e notable das temperaturas, tanto das mínimas como das máximas.
En Santiago de Compostela e nas comarcas do interior da provincia agárdase un sábado de ceos practicamente despexados e unha calor intensa desde o mediodía. Os termómetros marcarán valores elevados para o arranque de xullo, convertendo as prazas do casco histórico e os parques da capital nun auténtico forno a primeiras horas da tarde, onde o vento do nordés soprará de xeito moi frouxo, sen apenas aliviar a sensación térmica.
Máis de 30 graos e réxime de brisas na costa
A situación será lixeiramente diferente nas Rías Baixas. Aínda que o sol brillará con forza durante todo o día, a franxa litoral contará cun aliado estratéxico: as brisas térmicas de compoñente oeste. A partir do mediodía, este réxime de ventos costeiros entrará nas rías, contendo os termómetros nas vilas mariñeiras e praias, que aínda así superarán con folgura os 30 graos nas horas centrais do día.
O noso mar; Vento do nordés á mañá, do norte á tarde e do nordés á noite, forza 2 a 4 á mañá e 2 a 3 á tarde e á noite. Marusía á mañá e mar ovellado á tarde e á noite. Visibilidade boa. Mar de fondo do noroeste, con ondas de 0 a 1 metros.
