A OPP83 ofrecerá o vindeiro 1 de agosto, a partir das 13.00 horas en Bandourrío, unha degustación gratuíta con dúas elaboracións: salpicón de Lirio de Ribeira e tosta de Lirio de Ribeira con pan galego e guacamole
A OPP83 Cooperativa Galega do Mar Santa Eugenia continúa coa súa campaña estival de promoción do Lirio de Ribeira cunha nova acción gastronómica que terá lugar en Ribeira o vindeiro 1 de agosto: unha degustación gratuíta que comezará ás 13.00 horas en Bandourrío, coincidindo coa sardiñada popular das Festas de Verán de Ribeira.
A degustación, elaborada polo catering Chicolino, contempla dúas propostas gastronómicas para poñer en valor a calidade e versatilidade deste peixe ranco: un salpicón de Lirio de Ribeira e unha tosta de Lirio de Ribeira con pan galego e guacamole, que poderán degustarse ata esgotar existencias.
Esta actividade enmárcase na campaña estival de promoción do Lirio de Ribeira impulsada pola OPP83, coa que a entidade busca achegar o produto da frota local á veciñanza e aos turistas a través dalgunhas das principais citas do calendario festivo de Ribeira. A campaña comezou o pasado 24 de xullo cunha multitudinaria degustación durante a Festa da Dorna, na que se repartiron arredor dun milleiro de racións.
A acción promocional forma parte do Plan de Produción e Comercialización da OPP83, co financiamento da Xunta de Galicia e do FEMPA.
