A concelleira de Cultura, Patricia Lojo; a concelleira de Igualdade, Estefanía Ramos; e o concelleiro de Mocidade, Eloy Sobrido, presentaron na mañá deste 30 de xullo, xunto co responsábel do festival, Jhonatan Rey, o cartel da nova edición do A Pobra Summer Fest, que se celebrará o vindeiro 21 de agosto na praza Alcalde Segundo Durán.
O festival reunirá nunha mesma xornada as actuacións de Kid Mount, Nyan Boe, DJ Son1c, Aitor Lozano, DJ Places e Manu X, conformando unha programación musical dirixida especialmente á mocidade, pero aberta a toda a veciñanza, con entrada gratuíta.
Durante a presentación tamén se deu a coñecer a instalación dun Espazo Violeta, un punto de información, sensibilización e atención fronte ás violencias machistas que estará operativo durante toda a celebración do festival. Este servizo ten como obxectivo promover un ambiente de lecer seguro, baseado no respecto e na prevención de calquera tipo de agresión.
Con esta iniciativa, o Concello da Pobra do Caramiñal reafirma a súa aposta por unha programación estival de calidade, que combina propostas culturais e musicais con accións de sensibilización para contribuír a garantir espazos de lecer seguros e inclusivos para todas as persoas.
