Este venres 3 de xullo o Casino de Noia acolleu a inauguración da mostra Ría de vida, unha exposición fotográfica con obras de Enrique Martínez que nos convida a descubrir a extraordinaria fauna que habita a nosa comarca.
Dende as montañas ata as praias, pasando por bosques, dunas, zonas húmidas e mesmo espazos urbanos, esta mostra achéganos ás especies máis emblemáticas e singulares da ría de Noia e Muros a través dunha ollada chea de sensibilidade e respecto polo noso patrimonio natural.
A mostra poderá verse entre o 3 e o 30 de xullo, na sala de exposicións (1º andar) do Casino de Noia (con entrada libre).
Trátase “dunha oportunidade perfecta para coñecer mellor a natureza que nos rodea e sorprenderse coa extraordinaria biodiversidade da nosa ría”, salientou o Concello de Noia.
