Aínda non hai demasiado tempo que se cría que un municipio endebedado era o resultado dunha boa xestión e a consecuencia de dar cumprida resposta ás necesidades veciñais. Actualmente está constatado que pode ser tamén como consecuencia de prácticas corruptas ou dunha pésima xestión do diñeiro público ao gastar por enriba do teito de gasto e por conseguinte fóra das súas posibilidades.
En épocas de austeridade, onde debería primar un meirande control no gasto público e menos recortes en servizos básicos, atopámonos con administracións locais e autonómicas que destinan inxentes cantidades de diñeiro para obras faraónicas coa “desculpa” de que están xa orzadas, adxudicadas e que o diñeiro chega doutras administracións, central ou europea. Seica a Unión Europea non somos todos os cidadáns que vivimos e residimos nalgún dos vinte e sete países?
Os primeiros que teñen que dar exemplo de austeridade e boa xestión son os responsables públicos e a eles temos que esixirlles un pouco máis de respecto co diñeiro de todos, proceda da administración que proceda. Hai partidas orzamentarias básicas en asuntos básicos e fundamentais como a sanidade, a educación, a dependencia, servizos sociais e favorecer a creación do emprego que son primordiais para os cidadáns e a vida cotiá dunha gran parte de persoas.
