Unha praga inusual de patuxo ou pateiro está a afectar ás bateas fondeadas na rías galegas. Este patexo modificou os seus hábitos de vida e pasou a devorar dun xeito verdadeiramente voraz a cría de mexillón (mexilla) directamente nas cordas das bateas nas que esta se cría e engorda, o que constitúe unha grave ameaza para a campaña mexilloeira e, obviamente, para os bateeiros.
Os produtores integrados nas distintas organizacións mexilloeiras, entre estas a maioritaria OPMEGA, alertou dunha proliferación deste crustáceo que non se rexistraba dende moitos anos atrás, cando aínda os parques bateeiros eran moi minoritarios no contexto galego.
O patuxo “toma posesión” das cordas e come a mexilla causando graves perdas económicas, pondo en risco a produción de mexillón en áreas da importancia das Rías Baixas, a Ría de Arousa e a de Muros-Noia, esta a moi afectada xa polas pasadas choivas que provocaran unha alta desalinización das augas e as coñecidas graves consecuencias que tal feito tivo para o marisco de cuncha.
Os bateeiros están en máxima alerta e os biólogos estudan este tan inesperado troco nos hábitos de vida dos patexos, para o que non atopan unha explicación coherente.
Os produtores demandan apoio para avaliar os danos totais causados e aplicar alternativas que permitan frear o avance desta praga tan prexudicial para os seus intereses económicos e sociais.
O patuxo sempre estivo nas rías galegas, máis nunca se soubo que se alimentara da mexilla como agora fai.
