Este sábado 25 de xullo celebrouse na explanada do porto de Portocubelo (Carnota) a Festa Degustación dos Produtos da Reserva Mariña “Os Miñarzos”, organizada pola Confraría de Pescadores de Lira.
No acto participaron (entre outras autoridades) a conselleira do Mar, Marta Villaverde, e o patrón maior do pósito, Mariano Lago. A titular autonómica destacou esta cita gastronómica como un bo exemplo da promoción dos recursos do mar capturados mediante artes de pesca artesanais e respectuosas coa contorna.
Villaverde subliñou que “Os Miñarzos” constitúe a primeira reserva mariña de interese pesqueiro da costa atlántica peninsular e un modelo pioneiro de coxestión no que a comunidade pesqueira participa activamente no coidado e protección do seu medio. Neste senso, salientou que “a ordenación da actividade e o respecto polas zonas de reserva garanten un produto de calidade excepcional”.
A conselleira puxo de manifesto que a protección dos recursos mariños é o mellor garante para a viabilidade económica e o desenvolvemento do sector e tamén reafirmou o apoio do Goberno galego aos produtos do mar de Galicia.
