A parroquia de Aguiño xa conta cun renovado parque infantil na rúa Castelao co que se da resposta ás necesidades actuais da rapazada, segundo confirmou o Concello de Ribeira.
Este espazo de ocio infantil abriuse na tarde deste martes 7 de xullo.
Na reinauguración estivo presente a alcaldesa de Ribeira, María Sampedro, para comprobar o resultado das obras. A actuación centrouse na retirada dos anteriores elementos de xogo para crear unha nova superficie lixeiramente máis ampla, na que se colocaron un equipo combinado con capacidade para uns 36 nenos e nenas (dotado de tobogán, plataformas e zonas de rube), unha randeeira dobre, dous resortes con figuras de animais e un balancín tipo carrusel. A maiores, dotouse de pavimento de caucho continuo e mantívose o valado perimetral ao ser colocado recentemente.
Os traballos foron executados pola empresa Urbanismo Técnico Sostenible, S.L. por un importe de 86.887,84 euros, IVE incluído, dentro do POS+2025.
