Este sábado toca teatro galego en Noia, da man dun elenco de artista de primeira liña: Séchu Sende (autor), Fina Calleja (directora), Fernando Dacosta (dramaturxia xunto con Fina Calleja) e os actores Fernando Dacosta, Sabela Gago, Elena Seijo e Josito Porto.
Xuntas/os representarán no Coliseo Noela os contos de Séchu Sende incluídos no seu libro de relatos Made in Galiza.
Esta nova proposta de Sarabela Teatro emprega o humor, a poesía e a emoción para reflexionar sobre a relación da sociedade galega coa súa lingua. A través dunha sucesión de relatos e personaxes tan diversos como recoñecíbeis, aborda cuestións como a transmisión interxeracional do galego, a perda de palabras e a identidade cultural.
Trátase, en palabras do Concello de Noia, “dun espectáculo cunha mirada lúdica, crítica e profundamente humana, pensado para facer rir, emocionar e deixar conversa de volta á casa”.
Recomendado para público adulto e xuvenil a partir de 12 anos.
As entradas xa están á venda en Ataquilla.com.
