O Porto do Son vai ser este mes de xuño unha gran festa da cultura, da man da terceira edición da Feira Creasón, festival de arte, música e artesanía previsto para o vindeiro sábado 6 de xuño na vila sonense.
A cita será na praza de Rosalía de Castro ou, no caso de chuvia, no Polideportivo de Santa Irene.
Haberá mostra de artesanía, obradoiros para adultos e cativos, sesión vermú, contacontos, foliada, concertos e moito máis, segundo confirmou a organización do evento, Sonora Asociación Cultural en colaboración co Concello do Son, que compartiron este luns 1 de xuño o programa completo de actividades.
A xornada dará comezo ás 10.30 horas cun obradoiro de iniciación á pasamanería con Ana Vidal, e proseguirá ás 11.00 horas cun obradoiro con material de refugallo mariño con Fayna Blanco (Creamar) e cun taller de creación dun tecido colectivo en formato circular con Marie Müller.
Ás 11.30 aproximadamente dará comezo un taller creativo de cociña para a rapazada con Valuvai (Terra Mariñeira).
Logo ás 12.00 comezará unha mesa redonda con Leti do Chinto, Lidia Mariño e Luis de Carreira (CreaRedes).
Ás 13.30 haberá unha sesión vermú con Thais Suki.
Pola tarde celebrarase un obradoiro de pendentes de mar con Manela Penalta, ás 16.30 horas, e logo ás 17.00 está programada a presentación do libro Historias do val de Nebra de Xosé Piñeiro no Concello Vello.
Ás 17.30 horas haberá un obradoiro de coiro con Manel (CreaCoiro) e ás 17.30 horas unha sesión de contos infantís con Pelocho – Un Monstruo diferente de Natalia Torea e Don Carlos e o misterio dos lucecús de Patricia Torrado, na zona infantil.
Ás 18:00 dará comezo un obradoiro de cerámica con Laura Ventoso. E tamén un obradoiro de pintura de mascaras con Artesa Creativa.
Ás 19.00 horas celebrarase unha clase de baile tradicional con Gabriel das Chamosas.
A mostrará pechará ás 20.00 horas coa entrega de premios e sorteos.
Logo haberá unha foliada con grupos da contorna e ás 22.00 horas un concerto coas Pandereteiras de Tahúme e 7 Ferrados.
Ao rematar haberá foliada libre.
