O Concello de Noia incorporou durante un período de seis meses a cinco operarios que complementarán os traballos que desenvolve o Servizo Municipal de Obras, Medio Ambiente e Xardinería.
Esta contratación foi posíbel grazas a unha subvención de 52.000 euros concedida pola Deputación da Coruña a través do Plan de Emprego Local, unha iniciativa destinada a fomentar a creación de emprego e a mellorar a prestación dos servizos públicos nos concellos da provincia.
Os novos traballadores contribuirán ao mantemento e mellora dos espazos públicos, das zonas verdes e das infraestruturas municipais, reforzando a capacidade de resposta dos servizos municipais e favorecendo unha atención máis eficaz ás necesidades da veciñanza.
Desde o Concello agradeceron o apoio da Deputación da Coruña, que permite “impulsar o emprego local e fortalecer servizos esenciais para seguir construíndo unha contorna máis coidada, sostíbel e atractiva para todos e todas”, engadiron.
