O Bloque Nacionalista Galego (BNG) denunciou este martes no Parlamento de Galicia a existencia de dous censos diferentes e sen coordinación sobre o patrimonio cultural do litoral galego, unha situación que, segundo a deputada Rosa Pérez, evidencia a falta de planificación do Goberno galego na conservación e valorización da cultura marítima.
Durante a Comisión de Pesca, Pérez criticou que a Consellería de Medio Ambiente elaborase un catálogo propio de bens de valor cultural do litoral sen coordinarse coa Consellería do Mar, que desde 2021 desenvolve o Plan da Cultura Marítima de Galiza (PCUMA)-Horizonte 2030. Segundo lembrou, este plan supuxo un investimento próximo aos 400.000 euros e foi ampliado en 2025 para incluír tamén o patrimonio das illas galegas.
A deputada nacionalista cuestionou a necesidade de elaborar un novo catálogo cando xa existía un traballo previo en marcha. Neste sentido, explicou que o documento promovido por Medio Ambiente, aprobado o pasado 30 de marzo, recolle 2.003 bens culturais do litoral, mentres que o PCUMA presentou en maio un censo con 1.452 elementos documentados tras percorrer máis de 24.000 quilómetros de costa e habilitar un visor web para incorporar achegas cidadás ata finais deste ano.
“Resulta sorprendente que Medio Ambiente non contase coa Consellería do Mar cando esta xa levaba catro anos traballando no PCUMA”, afirmou Pérez. A deputada engadiu que o catálogo autonómico partía dun inventario elaborado en 2019 con apenas 459 bens e que, durante o período de exposición pública, se detectou a ausencia de 107 inmobles que finalmente tiveron que ser incorporados.
O BNG puxo tamén o foco nas diferenzas de enfoque entre ambos os dous documentos. Segundo explicou a parlamentaria, mentres o plan impulsado pola Consellería do Mar ten un carácter principalmente divulgativo e de catalogación, o elaborado por Medio Ambiente pretende facilitar novos usos para determinados elementos patrimoniais, como fábricas de salgadura, faros ou muíños.
“É unha cuestión moi relevante porque un mesmo ben podería ter destinos moi distintos segundo o catálogo que se tome como referencia”, advertiu Rosa Pérez, quen solicitou explicacións á directora xeral sobre os obxectivos concretos de cada iniciativa e sobre os mecanismos de coordinación existentes entre departamentos.
A formación nacionalista reclamou ao Executivo galego que defina unha estratexia única para a protección do patrimonio marítimo e litoral, acompañada de recursos económicos suficientes e medidas efectivas de conservación. Segundo o BNG, a actual situación de duplicidade pode dificultar a protección dun legado cultural que consideran fundamental para a identidade de Galicia.
A deputada avanzou que o grupo parlamentario volverá levar esta cuestión ao pleno da Cámara autonómica se o Goberno non ofrece respostas concretas nun prazo razoable. “O patrimonio marítimo galego precisa planificación, coordinación e compromiso institucional para facer fronte ás agresións humanas e ao abandono”, concluíu.
