Após a caída do Imperio Romano, o Reino Suevo de Galicia constituíuse coma o primeiro reino medieval de Europa Occidental, deixando de existir oficialmente coma entidade administrativa e territorial o 30 de novembro de 1833, cando o ministro Javier de Burgos decidiu unha nova división provincial pola que se suprimían as antigas xurisdicións do Antigo Réxime de España. Por tal división o territorio galego fragmentouse nas actuais catro provincias: A Coruña, Lugo, Ourense e Pontevedra.
A integración na Coroa de Castela no remate do século XV e baixo o reinado dos Reis Católicos, fixo que Galicia perdese a súa autonomía administrativa malia que formalmente a mantivera como “Reino de Galicia” ata a devandita reforma de 1833.
O primeiro reino de Galicia (reino suevo de Gallaecia) foi fundado no ano 411 despois de Cristo polo pobo xermánico dos suevos que, mediante un acordo co Imperio Romano estableceron a súa capital na cidade de Braga, abranguendo grande parte do noroeste peninsular.
O territorio do Antigo Reyno de Galicia dispuña de sete provincias: Santiago, A Coruña, Betanzos, Lugo,, Mondoñedo, Ourense e Tui.
Pero estes antecedentes históricos non abondan ao expresidente do Goberno José María Aznar, para quen “un non pode inventarse nacións que nunca existiron , a conta da desaparición da nación centenaria que si existía”. Engade Aznar nunha declaración feita no Instituto Atlántico de Goberno que “O departamento da nación española, por riba de calquera ensoñación destes mequetrefes que din por algures que uns tentan crear unha república confederal con non sei cantas nacións”, e pregunta “Pero que se cren, que as nacións se fan e desfán a expensas do que conveña a calquera destes mentecatos que están a ocupar algún cargo neste intre?”.
A conquista de Granada e o descubrimento de América son fitos do ano 1492 considerados simbolicamente como a orixe da España moderna, polo que a percepción aznariana de “invencións históricas” a respecto da antigüidade do Reino de España é moi posterior a, por exemplo, o Reyno Suevo de Galicia.
Non é por nada.
