O Concello de Rois abre este xoves 18 de xuño o prazo de matrícula da Escola municipal de música (ESMU) para o curso 2026-2027. As persoas interesadas poderán formalizar a súa inscrición ata o venres 10 de xullo a través dun formulario dispoñíbel na web municipal.
A ESMU de Rois ofrece formación dirixida a nenos e nenas a partir de cuarto de Educación Infantil, así como a persoas adultas. Entre as ensinanzas dispoñibles atópanse as clases de música e movemento, destinadas á rapazada de entre 3 e 7 anos, e as materias de linguaxe musical (en grupo ou individuais, segundo a idade) ou harmonía.
Como novidade para o curso 2026-2027, a Escola municipal de música diferencia dúas materias específicas de harmonía. Por unha banda, a harmonía moderna, orientada a comprender como se constrúe a música actual a través do estudo práctico de acordes, progresións e melodías presentes en estilos como o pop, o rock ou o jazz, fomentando a creación e os arranxos musicais para distintas agrupacións. Por outra, a harmonía clásica céntrase no estudo da combinación dos sons e dos acordes desde o barroco ata o romanticismo, abordando as funcións tonais, a formación e enlace de acordes e a análise das obras interpretadas polo alumnado, co obxectivo de favorecer a comprensión musical, a memorización e a capacidade de analizar e de crear composicións con sentido harmónico.
A oferta complétase con clases individuais de canto e de diferentes instrumentos, entre eles guitarra, piano, percusión e batería, violín, viola, violoncello, contrabaixo, baixo eléctrico, acordeón e especialidades de vento metal, como trompeta, trompa, trombón ou tuba, e de vento madeira, como saxofón e clarinete.
A programación inclúe tamén actividades grupais, como os conxuntos instrumental, de acordeóns, de percusión ou o conxunto viaxeiro, que participa nos intercambios que a ESMU realiza con outras escolas de música. Tamén hai unha orquestra de cordas, un coro infantil e outro coro para persoas adultas.
A matrícula anual ten un custo de 30 euros, aos que se engaden as taxas correspondentes ás distintas actividades. As clases de música e movemento e de linguaxe musical dunha hora teñen unha cota mensual de 20 euros. Os programas que combinan linguaxe musical e instrumento teñen un prezo de 40 euros mensuais para as clases de 30 minutos de instrumento e de 50 euros para as de 60 minutos. As materias illadas para persoas maiores de 16 anos teñen un custo de 40 euros ao mes, mentres que as clases de harmonía e de instrumento complementario teñen unha cota de 15 euros mensuais.
No caso do coro, a participación no coro infantil e no coro de persoas adultas ten un prezo de 20 euros ao mes. As actividades de coro e conxunto Instrumental son gratuítas para o alumnado matriculado na Escola municipal de música.
