O balance económico consolidado do exercicio alcanzou os 31,4 millóns de euros grazas ao aumento das achegas dos fieis e ao bo rendemento financeiro.
O arcebispo de Santiago de Compostela, monseñor Francisco José Prieto Fernández, presidiu na sede da Curia a reunión do Consello de Asuntos Económicos da Diocese para estudar e aprobar as contas diocesanas e a liquidación do orzamento do exercicio 2025. Este organismo, integrado por sacerdotes e laicos expertos en economía e dereito, cumpre a función establecida no Código de Dereito Canónico de validar os ingresos e gastos eclesiásticos.
Durante a sesión, o ecónomo diocesano, Fernando Barros, presentou o informe económico completo, que reflicte un ano de “crecemento sostido, xestión prudente e capacidade de financiamento positiva”. Barros destacou que “a transparencia é parte esencial da nosa misión” e reafirmou o compromiso institucional coa rendición de contas.
Incremento nas achegas dos fieis e rendementos do patrimonio
As contas diocesanas integradas —que inclúen os Fondos Diocesanos, Depósitos de Parroquias, o ISC, as fundacións e as contas de parroquias e entes— sumaron en 2025 un total de 31.405.739,12 euros, o que supón un incremento do 7,94% respecto a 2024 e un 22,66% máis do orzado.
Os ingresos ordinarios situáronse en 29,6 millóns de euros (+9,47%), destacando os seguintes factores:
- Achegas dos fieis: Crecieron un 6,78% respecto ao ano anterior ata representar o 37,44% do total dos ingresos.
- Asignación tributaria (IRPF): Aumentou un 16,35%, consolidándose como case o 30% dos recursos da diocese.
- Patrimonio e investimentos: Medraron un 13,80%, impulsados polo excelente comportamento das carteiras de investimento, cuxos rendementos subiron un 31,42% en comparación con 2024.
Pola contra, os ingresos extraordinarios descenderon un 12,31% debido á forte redución do alleamento de patrimonio (un 85,77% menos) e a unha reestruturación contable das subvencións de capital.
Máis investimento en acción pastoral, persoal e conservación
No capítulo de gastos ordinarios, a Diocese de Santiago investiu 22.992.286,02 euros, un 10,94% máis que no exercicio anterior. O informe detalla incrementos relevantes en partidas clave:
- Accións pastorais e asistenciais: Medraron un 7,60%.
- Gastos de persoal: A retribución do clero subiu un 5,30%, mentres que a do persoal seglar aumentou un 18,64% debido ao incremento de custos sociais e a novas contratacións.
- Conservación de edificios e funcionamento: Incrementáronse un 14,32% e xa representan case o 30% do gasto total.
Pola súa banda, os gastos extraordinarios ascenderon a 5,6 millóns de euros (+5,23%), destinados principalmente a programas de rehabilitación de inmóbles.
Superávit e compromiso coa transparencia
Malia o incremento xeral dos custos, a diocese pechou o exercicio de 2025 cunha capacidade de financiamento positiva de 2.759.417,02 euros, o que confirma a súa estabilidade económica.
O arcebispo, mons. Francisco José Prieto, subliñou que a presentación pública do balance é “un exercicio de responsabilidade e comuñón”, recordando que a xestión económica está sempre ao servizo da misión pastoral e social da Igrexa.
Toda a información detallada, convenios, estudos e informes económicos deste exercicio poden consultarse de xeito público a través do Portal de Transparencia do Arzobispado de Santiago de Compostela.
