Este domingo, 3 de maio, inaugurouse o novo Campo de Fútbol do Sar, tras a completa renovación do seu céspede artificial, nunha actuación que supuxo un investimento total de 334.000 euros a través do Plan de Obras e Servizos POS+ da Deputación da Coruña.
Segundo informou o Concello, as obras “permitiron modernizar unha infraestrutura deportiva que presentaba un notábel desgaste tras máis de dúas décadas de uso”. Ademais da substitución do céspede artificial, os traballos incluíron a renovación integral do sistema de rego e do valado perimetral do terreo de xogo, así como a instalación dunha rede de protección traseira nunha das porterías, reforzando deste xeito a seguridade das instalacións.
De maneira complementaria, e con fondos propios, o Concello de Padrón aproveitou a pausa da actividade deportiva para acometer diversas melloras nos vestiarios. Entre elas, destacan a renovación do mobiliario con novos bancos e a habilitación dun vestiario feminino, que permitirá mellorar as condicións de uso para as xogadoras.
No acto inaugural participaron o alcalde de Padrón, Anxo Arca, e o concelleiro de Deportes, Luis Mariño, acompañados polo deputado provincial de Deportes, Antonio Leira; polo vicepresidente da Real Federación Galega de Fútbol, Manuel Lores; e pola presidenta do C.D. SAR Extramundi, Adriana Vázquez.
Durante a súa intervención, o alcalde deulles as grazas á presidenta do club “polo seu empeño en mellorar as instalacións”, e tamén a todos os xogadores e xogadoras e ás súas familias “por ter aguantado os duros meses de execución das obras”. Arca celebrou que, “ás portas do seu centenario, co campo renovado, o Sar continuará facendo historia e sendo un orgullo para Padrón”.
Con esta actuación, o campo de fútbol de Estramundi dá un paso firme cara ao futuro, dotándose de instalacións modernas e sistemas de última xeración que garantirán a práctica deportiva en condicións óptimas e consolidan este espazo como referente no ámbito futbolístico da contorna.
A xornada de inauguración tivo un partido de estrea cargado de emoción, no que o Sar se enfrontou a un rival directo, o Noia CF, nun encontro clave para manter as opcións de permanencia. O equipo local acadou unha contundente vitoria por 6-2 que fixo vibrar a afección presente.
